खेत मेँ साटो
पुराणो आटो
अणगङ भाटो
राफलियों ही करे ।
उजळा नेता
हीङ्क्या कुता
सिँघ सुता
राफळ ही करेँ ।
कूजाग्या रूंबो ..
दौङ मेँ कुबो ..
घर मेँ तूंबो
राफळ ही करेँ ।
नखराळी छोरी
ओछी डोरी
खाली तिजोरी
राफल ही करेँ ।
हींजङा की ताळी
अंधेरा मेँ नाळी
माटो हाळी
राफळ ही करेँ ।
अणपढ मंतरी
थाकोङो संतरी
टुटोङी छतरी
राफळियों ही करे ।
बिखरेङी बुहारी
थोङी जुंवारी
मां कुवारी
रफळियो हीकरे ।
कबूङा के सिकरो
गाया के गळे को डींगरो
ऊंदरा के पीँजरो
राफळीयो हीकरे ।
पानै पर सेइ को टोपो
छकङे मेँ बोदो खोपो
दुकान मेँ मुनीम डोपो
राफळीयो हीकरे ।
बाङी मेँ सूवो
बळतो बळतो कुवो
रूंख हैठे जूवो
राफळीयो हीकरे ।
अङयोङी घोङी
काची पकोङी
ऊंट बळद की जोङी
राफळीयों ही करेँ ।
जाङ हेठे गूंद
अणूती तूंद
अचार मेँ फफूंद
राफळीयों ही करेँ ।
कोड मेँ खाज
बङक्योङा राछ
ढोंगी माराज
रफळीयों ही करेँ ।
मारवाङ माय लू
कुघराने की भू
माथे माय जूं
राफळीयो ही करेँ ।
दूध माय माकी
गुटके री फाकी
टूटोङी नाकी
राफळीयों ही करेँ ।
अणूती ताण
परदेशी खाण
ताकङी मेँ काण
रफळीयो ही करेँ ।
झूंठी साख
फूटेङी आंख
उगाङी राख
राफळीयों ही करेँ ।
चोरा की जामनी
लुगाई बावनी
कुती खावणी
राफळ ही करे ।
मठा मेँ मोडा
बुढापे मेँ गोडा
उतरेङा डोडा
राफळीयोही करे ।
अणूतो लोब
झूंठो रोब
अणचायो थोब
राफळीयो हीकरे ।
गरमी मेँ सूंठ
सियाळे मेँ उंट
खेत मेँ भरूंट
राफळियौं ही करेँ
No comments:
Post a Comment